《金枝慾孽》18周年！鄧萃雯嘆娛圈好比宮鬥：被打過落冷宮多次

無綫經典劇集《金枝慾孽》日前開播18周年，「如妃」鄧萃雯與「王后」陳秀珠罕有同框直播，暢談當年拍攝趣事，大爆當年太入戲，曾假戲真做，不但動真火拍嗌交戲，戲外亦會爭頭飾鬥靚，陳秀珠甚至不惜纖體，免被「如妃」蓋過風頭，不過私底下佢哋感情卻非常好，至今依然有聯繫。

另外，鄧萃雯亦有發文，細說對劇集嘅見解，更將深宮中嘅爾虞我詐與娛樂圈作比較，坦言：「娛樂圈的趨炎附勢跟宮廷不遑多讓，本人被打過落冷宮多次，已學懂了堅毅傲骨不自憐，養精蓄銳再蓄勢待發！」至於有網民留言問到佢與娘家TVB嘅關係，直指：「聽說你討厭TVB，再也不回TVB了是嗎？」鄧萃雯就澄清：「還有一套巾幗梟雄等着要拍，不要亂信謠言，謠言止於智者。」同時透露一直延期嘅《巾幗梟雄4》依然開拍在望。