傳為胡歌誕千金　王曉晨被指狀態似足坐完月

內地39歲男神胡歌，自2015年演出電視劇《瑯琊榜》後人氣飆升，曾被笑言係好兄弟霍建華「小三」嘅佢，隨住圈中好友開始組織家庭，長期對外宣稱單身嘅佢感情世界備受矚目，近年曾傳出佢同細6歲嘅女星王曉晨已秘密結婚，依家更傳出女方為佢生咗個囡囡，就連近況都被指係「剛坐完月子」！

王曉晨出道多年，同胡歌因合作電視劇《大好時光》而傳出緋聞，近幾年更謠傳佢哋領證結婚，及偷偷產子等消息，胡歌舊年先親自透過工作室否認二人拍拖緋聞。點知經常拍片同粉絲互動嘅王曉晨，最近公開自己運動影片時，雖然大方晒出小蠻腰同長腿，但就被網友指佢身材似「剛出月子」，仲有大批網友留言「剛剛我看營銷號說你跟胡歌生了個女兒」、「是不是偷偷結婚了，看見戒指了」等，激到王曉晨出面一一回覆留言，表示「離了個大譜」、「怎麼不說我生了個猴子呢？」、「我的姻緣就是這樣被擋的」，親自否認密婚生子傳言，言語間無奈至極。