關智斌受牙肉發炎折騰:食羽衣甘藍好似食刀片咁
20220902
東網電視
更多新聞短片
![](/hk/bkn/cnt/entertainment/20220902/photo/bkn-20220902181927987-0902_00862_001_01p.jpg?20220902192057)
藝人關智斌(Kenny)今日(2日)出席電影開鏡儀式,Kenny指自己牙肉發炎好辛苦,他説:「講嘢有啲辛苦,但食嘢先大鑊,早幾日食羽衣甘藍好似食刀片咁,睇嚟我只係可以食雪糕。(財多身子弱?)我要更多財!亦都要身體健康,哈哈。」他指現時中港兩地走拍電影:「拍完呢套月底左右返去。(隔離日數少咗方便兩邊走?)我主要都係睇邊度搵我咪去邊度,哈哈,如果唔使隔離我即刻攞3個月假去旅行,邊度Open我就去。(泰國依家開放咗)泰國我睇咗新聞唔敢去呀!好驚呀驚畀人呃。(你好易呃?)我信冇咁大隻蛤乸隨街跳,我要問清問楚,試過有次收到電話話搞強積金,仲約我出去傾,我話好呀仲追問佢叫咩名,點知佢cut咗我線,哈哈。」
電影中他飾演一名表裏不一的角色,而最大難度莫過於有大量對白:「今次係翻拍一套荷里活電影,呢套戲出名係好多好多對白,我有成200百紙對白,足足背咗三個禮拜,同埋之前我哋好似做舞台劇咁排過,因為套戲個時間性係一氣呵成,有啲舞台劇嘅感覺,所以對白要記得好熟。」
另早前張敬軒成功「打劫」老闆楊受成十隻過百萬名錶,Kennny笑言未有對方般厲害:「我只係去遊船河時講過想買Wakeboard 船,老闆一星期後就俾款式我睇,之後就買咗艘200幾萬嘅快艇,等我、周家怡同衞詩雅去玩,老闆真係好錫我哋。」