張天賦「經理人」怒插洪嘉豪粉絲：幫個地球製造垃圾！

歌手MC張天賦同洪嘉豪一向老友，日前二人仲舉行《Kaho x MC Frenemy Live 2022》演唱會。演唱會首日，洪嘉豪嘅粉絲就喺現場派發應援嘅螢光長棒，但有觀眾就投訴睇Show嗰陣被長棒阻礙視線，所以張天賦嘅粉絲專頁就叫大家唔好再帶長棒嘅應援物品入場。

但之後幾場Show依然有粉絲揮長棒為偶像打氣，搞到張天賦嘅「社交網群組管理員」（Yee Yee）留言怒插洪嘉豪粉絲：「真係唔好再有演唱會同場派嗰支咁嘅嘢，畀幾毫子出嚟就做到好似好大應援真係好威威？阻住其他人睇Show，幫個地球製造垃圾，真係多得你唔少。賦二代（張天賦粉絲專稱）千祈唔好學」、「如果天真咁覺得咁樣就係勁，係自己呃自己再呃埋粒星」。消息傳出後，即引起極大爭議，更有討論區成員以「MC點睇佢經理人咁憎洪嘉豪」出Post，不過有指Yee Yee並非張天賦經理人，只係是助理同後援會管理員。