吳彥祖孫悟空Look成身毛　力戰「功夫觀音」楊紫瓊

今年年初有指漫威首部華人超級英雄電影《尚氣與十環幫傳奇》（Shang-Chi and the Legend of the Ten Rings）導演Destin Daniel Cretton將開拍劇集《美生中國人》（American Born Chinese），並由「尚氣阿姨」楊紫瓊同吳彥祖主演，當時已有指創作靈感來自《西遊記》，劇中楊紫瓊會做「觀音」，吳彥祖則飾演孫悟空，大家都引頸以待。估唔到相隔半年，依家終於都有造型照流出！見「孫悟空」吳彥祖一身毛毛，一睇就係「孫悟空」格，其大聖造型唔再用傳統紅黃色，反而改以藍金色上陣，造型特別，估計佢都會有破格演出。而楊紫瓊嘅「觀音娘娘」Look就頭戴蓮花，一身淺色仙氣打扮Keep住個傳統味道，不過見佢喺海報上揮臂似打功夫，估計角色性格未如傳統一動不如一靜嘅距離感。

另外美國時間9月10日，吳彥祖同楊紫瓊就齊齊現身美國加州阿納海姆，攜新劇《美生中國人》出席，變番「凡人」嘅佢哋都換上眼鏡Look示人。而好友朗郎亦喺尋日晒出同吳彥祖夫婦一同食中秋飯嘅合照，心情大靚。