抽水慣犯︱張翰新劇揸女主角胸　張鈞甯都曾受害？

內地一線男星張翰首次擔任編劇嘅電視《東八區的先生們》，早前就被爆出扯Bra帶一幕疑抄襲韓星李鍾碩舊作《熱血青春》畫面，估唔到事隔幾日，最新一集調情講到張翰同女主角、劇中女友王曉晨餐枱調情時，竟當住鏡頭一手揸落對方胸前，之後極速收手，即惹鹹豬手之嫌，令網友嘩然！

《東》劇情講到張翰同王曉晨喺屋企食飯調情，佢一手將王曉晨抱到自己大髀，點知佢隻手明顯由女方腰部游移到胸前，甚至仲按壓女方雙峰，雖劇情營造情侶間嘅親密感，但張翰嘅手部動作令網友激動畀負評，質疑佢係刻意幫自己加戲，兼乘機食女星豆腐，甚至有網友怒罵要求封殺此等惡劣演員，亦心痛王曉晨被職場性騷擾，喺鏡頭下有冤無路數。

網友更搵到張翰疑似多次抽女藝人水嘅場面，單單《東》入面，佢試過借同王曉晨咀嘴時將手游走去對方臀部、拍床戲時故意胸襲對方；過去佢亦曾喺偶像劇《溫暖的弦》入面，偷摸張鈞甯Patpat，以及借轉圈之勢以手撞向張鈞甯胸部，真係睇到網友眼火爆！