港姐2022︱梁超怡爆喊演「初哥哥」吹哨子　邢慧敏畫功獲讚

《2022香港小姐競選》將於9月25日舉行總決賽，一眾候選佳麗積極備戰，務求以最佳狀態示人，連日嚟無綫社交網發布佳麗們才藝表演，希望令觀眾於總決賽前對一眾佳麗有更深的認識。

大熱之一「翻版孫藝珍」梁超怡（Joey）嘅才藝表演，係演劇集《十月初五的月光》入面「初哥哥」吹哨子嘅經典一幕，同時仲有一場喊戲，拍攝嘅鏡頭放大咗佢個喊樣，睇到佢流出真眼淚，表情控制得唔錯，獲網民一致好評！而佢仲邊喊邊講番自己點解會選擇演呢一段戲，佢話：「我揀呢段戲除咗我好鍾意演戲之外，我亦都好鍾意師姐佘詩曼，希望將來有一日成為一個同佢一樣咁優秀嘅藝人。」

另一大熱「連詩雅師妹」邢慧敏嘅才藝展示，就係畫水墨畫，睇到佢好輕鬆就畫得到蝴蝶撲花嘅畫，睇到佢畫到隻蝴蝶栩栩如生，獲網民大讚畫功好！佢覺得蝴蝶能夠帶畀人希望，而蝴蝶由蛹破繭而出，蛻變成蝴蝶嘅經歷，就好似佢呢次參加香港小姐嘅經歷一樣，令佢大開眼界呀，佢仲表示會勇於挑戰自己，開展出同蝴蝶一樣嘅燦爛人生！