港姐2022︱統籌經理何小慧強調唔會取消泳裝環節

本屆港姐總決賽將於本月25日假紅館舉行，今午（21日）舉行記者會，「主席評判團」及「最上鏡評判團」包括特首夫人李林麗嬋、琦琦及陳法蓉等列席，與19位佳麗見面及合照，場面熱鬧。

統籌經理何小慧受訪時，提到無綫就有監警會委員指《港姐》泳裝少布，及牽涉兒童色情等言論發表聲明作回應，她直言覺得會影響港姐形象：「不過公司已即時發咗聲明，所以我唔再多作回應。港姐係已經50周年嘅品牌，公司已好快反應咁去保護。（泳裝環節安排會有改動？）唔會喇，因一早已經安排好。其實泳裝環節一向都有，上次泳裝活動我聽到聲音話唔夠性感。我哋泳裝每年嘅設計都包含時下流行元素，唔會特別買弄小唔小布。」

何小慧更覺得類似新聞相信不會影響台前幕後士氣：「總決賽就嚟進入大直路，大會反而全力抗疫，將保護一眾參賽者避免受到影響，期待19個都順順利利咁咁上到台。」

提到邀得李林麗嬋擔任評判，何小慧指對方身為慈善團體會長：「今次好開心能夠合作，希望賣枱能夠籌到更多善款，佢支持會務，一口答應。（特首到時都會出席？）應該唔會喇。」