林作疑出軌激嬲裕美　即許13個承諾賠罪：再做錯賠1000萬！

自封「香港抽水王」嘅林作自4年前同裕美拍拖後經常放閃，相當恩愛。不過琴晚（22日）林作就疑似「出軌」，喺社交網發長文向裕美道歉，寫到：「本人鄭重向裕美道歉，本人最近因工作過度忙碌而忽略了你，令你覺得不在我的第一位，甚至懷疑本人與他人有染。本人承認，認為女人有點煩，目前覺得一個都嫌多。但我只有你一個，現在是，以後也是。我承諾，每晚最後一小時都是只和你在一起，注意力都在你身上。」而貼文一出，網民即紛紛留言：「歡喜冤家」、「睇嚟美姐今次好嬲」、「肯承諾先係真男人」、「加油，早日結婚」，仲話畀佢哋花式耍花槍閃盲咗。

事後東網記者再聯絡林作，佢表示：「佢（裕美）話我對佢好冷淡，以為我有咗第二個，話我對住其他人好熱情，咁我梗係冇啦，清者自清啦！」之後又話：「實情我依家條女就係我嘅事業，搞到我冇心機睬佢囉，夜晚返到屋企見到佢都想瞓覺，咁佢咪覺得我冷落咗佢囉。」仲話大鑊到爭啲搞到分手，好彩依家冇事咋！

至於被男友激嬲嘅裕美就話：「佢又唔係出軌。（咁信佢？）佢能力又唔係咁好。」佢表示最憎被男友唔尊重，以及講嘢唔算數，佢話：「每次鬧交佢就律師上身，為咗鬧贏你，而唔係解決問題，試過鬧佢，佢仲試西裝照鏡，又問你可以將鬧交對話PO上網得唔得，真係愈嚟愈火。」佢表示未嬲完，等男友承諾過嘅說話兌現至算，佢話：「追你時乜都好，追到當你碌樹咁擺喺度，做女人唔能夠太委屈，要有底線，佢賴皮就無敵，唔可以下下咁易原諒佢。」

而今日（23日）林作再上載同裕美食飯嘅照片，更向對方許下13個承諾，寫到：「1.講咗嘅嘢要做、2.唔可以出爾反爾、3.吵架不駁嘴、4.講完要算數、5.要擺你在第一位、6.要尊重你、7.唔好大你、8.要一條team、9.對你的態度不能和對別人態度一樣，要特別好，老婆般、10.要多考慮對方感受、11.要細心、12.不能串/潤你，淨係可以串其他人、13.要多想起你，希望得到全港人見證，我再做錯，賠償1000萬。」