陳思圻親解失聯因由 否認被「大龍生」羅樂林粗口鬧爆

2022年09月24日 15:06
東網電視
更多新聞短片
藝人陳思圻近日一度「失聯」,原來是她棄用自己的手機號碼,改用了已移民媽媽的電話:「因為雙親近日移民咗去馬來西亞,我見媽咪個電話號碼靚,就保留咗自己用。(好唔捨得屋企人?)送機之後,我喊咗兩日。父母覺得馬來西亞氣候幾好,起居飲食都係中英文搞得掂,況且生活指數比較低,所以咪去囉。(你遲啲會唔會過埋去?)唔會嘞,過去探吓佢哋就得。」
談到她日前受訪,自爆拍攝《愛·回家之開心速遞》時,曾遭「大前輩」粗口問候,事後事件發酵,不少網民「緝兇」,就連「大龍生」羅樂林亦擔心自己「講咗唔記得」!陳思圻笑說:「一定唔係爸爸(羅樂林),佢咁斯文,況且我哋關係好好。(呂慧儀叫你開名喎!)其實大家唔使估嘞,我根本冇諗過開名,只係當日問我,咁我真係有經歷過,而呢個情況相信好多藝人都有類似嘅經歷,唔係好大件事啫。拍嘢難免有時會煩躁同忟,我冇嬲。(事後有冇喊?)有,返屋企會反省吓自己係咪做得唔好,夜闌人靜時難免傷感。」
談到接下來新工作,她透露:「同緊唔同嘅平台接觸,可能會出埠拍旅遊節目。(最想去邊?)歐洲,因為我好鍾意睇當地嘅建築物。(唔係想睇男仔咩?)梗係男仔睇我啦。」