姚焯菲獲粉絲第五擊慶生 急趕現場打卡送「小菲象」驚喜

2022年09月24日 21:21
東網電視
更多新聞短片
「國民初戀」姚焯菲(Chantel)嘅16歲正日生日雖然已過,不過佢嘅應援圑「小菲象」依然繼續舉行第五擊慶生活動,就喺今日(24日)嘅銅鑼灣中央圖書館外,一早有成400人排隊攞應援包,其中以小朋友居多。而應援包入面嘅禮物相當豐富,包括一系列以生日為主題嘅紀念品,仲有以前從未公開過嘅「小公主」相片製成嘅應援物。「小菲象」仲搵咗幫佢作《#BBF》嘅作曲人林奕匡、《聲夢》導師JW ,一大班「聲夢」學員好似炎明熹、鍾柔美、詹天文、何晉樂、林君蓮等,為Chantel錄咗條慶生祝福片添。
講番喺中央圖書館外嘅情況,由於Chantel趕唔切嚟,所以「小菲象」嘅圑長就拍咗現場實況畀佢睇,仲同佢玩視像添。素顏嘅Chantel睇見啲粉絲咁錫佢,都好開心、好感動,隔住個Mon同「小菲象」揮手、傾偈,當佢見到應援包裏面有佢細個好得意嘅童年照時,仲笑到揞住個嘴添。而最大彩蛋係Chantel突然趕到現場打卡,為呢次應援活動作完滿嘅結束。