披荊斬棘︱「大灣區」哥哥全數帶旺　吳卓羲最多Job升呢綜藝王

內地真人騷《披荊斬棘》現正熱播，同上一輯一樣唔少港星都憑節目人氣急升，比賽未完已經有唔少工作機會埋身，個個身價上升。當中溫兆倫及劉愷威於內地發展多時，近年鮮有影視新作推出，但隨節目播出後即時翻Hit，更有幸獲邀加盟央視中秋晚會，曝光率大增。而「冧莊」嘅陳小春及張智霖，就延續上輯強勢，廣告、代言接唔停，依然有價有市。至於周柏豪及曾比特早前已憑《聲生不息》累積不少人氣，現亮相《披》即「火上加油」，周柏豪目前已拍下兩個雜誌封面開拓內地市場，曾比特更擔任食品品牌大使以及獲邀拍攝手機廣告，吸金力大增。

不過要數最勁嘅，絕對非「雙龍組合」吳卓羲及林峯莫屬，呢對好兄弟於節目中嘅真情流露大受歡迎，不但拍住上登上多本雜誌封面，兼齊齊參與錄製國民節目《快樂大本營》改版後嘅《你好，星期六！》，其中吳卓羲更有份參與節目衍生的團體真人騷《我們的滾燙人生2》，係唯一一位有份嘅港星，同期孭住3個節目，升呢綜藝王！