符曦月入行初心不變 大談《黑金風暴》辛酸史

20220925
東網電視
更多新聞短片
藝人符曦月(Valerie)自2017年在北京進修戲劇課程,並在當地居留生活2年多。她現時身兼多個身份,編劇、演員和策劃畫展,並推出過不少作品,包括:舞台劇《人性遊戲 》、電影《作家的謊言》、電視劇《好人好姐》和《黑金風暴》,以及綜藝節目《貧窮限制想像》。
最近《黑金風暴》熱播,不少觀眾對她的演出表現讚好。她接受東網訪問分享劇集中最難忘的一幕:「第一次床戲,雖然無親熱鏡頭只係借位除岱融哥嘅衫,但其實當日第一次好尷尬,好彩岱融哥都好好人好快就拍完。另外就係拍綁架戲時受傷,手臂有成個手掌咁大嘅瘀痕,但當時未叫cut,唔知道傷成咁,當時痛到標哂冷汗,cut左機先知原來已經瘀到咁。」
至於在角色揣摩上,她表示:「我有為了角色寫人物小傳,大概係日記咁樣嘅形式,因為呢個角色其實係由佢17歲做到25歲,呢段時間係劉曉彤人生最反叛既時候,要熟悉佢點解會表面上咁乖女,但實際上又唔係,就要由佢細個經歷過嘅嘢開始。所以我選擇咗寫日記。」
她透露最希望同林峯再做對手戲,因為當時拍攝《黑金風暴》唯一與他的一場對手戲,就是當時自己睡在屍袋裏面的一幕!至於未來想挑戰拍咩類型嘅戲,她直言一直好想拍古裝,但覺得香港比較少機會,強調當一個好演員不單止是外表,必需要在心態上堅持到底,多番練習,希望未來的日子會主要投入幕前演出。
最後被問到為甚麼會選擇進軍娛樂圈,她分享:「我好鍾意電影呢一行,覺得電影所帶出來嘅訊息,係可以影響一個人嘅人生,而演員作為一個載體,去感受同埋經歷人生再去演繹出嚟,呢種藝術係令我感動。」