港姐︱林俊賢女兒林鈺洧摘后冠 梁超怡成雙料季軍

20220925
東網電視
更多新聞短片
《2022香港小姐競選決賽》終於揭盅,芳齡27歲、林俊賢女兒林鈺洧狀態大勇,全晚表現出色,最後奪得冠軍。亞軍則是許子萱,季軍由梁超怡奪得,兼奪最上鏡小姐。不過林鈺洧在加冕不慎露底,引起不少網民討論。
港姐冠軍林鈺洧在封后一刻面露驚訝表情,並反問是否自己,她受訪時坦言對得獎感驚訝:「因為我唔係好滿意自己今晚表現,可能我對自己要求比較高同苛刻,未達到自己預期標準,尤其係問答環節,時間上控制得唔好。(點解爸爸今晚冇嚟現場?)三星期前攞到飛嘅時候,曾經問過爸爸會唔會來港支持我,佢喺內地工作,佢話唔想隔離,所以冇嚟。(爸爸表態話唔支持你參選喎!)算係剝咗佢棚牙,5月中通知爸爸我想參選,佢同我講唔好玩呢啲嘢。(依家最想做乜?)瞓番一覺好,因為以前冇乜參加過大型比賽,今次算第二次,雖然有個好美好回憶,但都好攰,所以想瞓覺好。(諗住入行?)持開放態度,但最想做係慈善事業。」
亞軍許子萱兼奪得「國際親善大使」及「生態保育大使獎」,成為「三料港姐」。當她得悉獲亞軍時臉色一沉即展出尷尬笑容,明顯失去了眼神的光采,看似不甘失落冠軍寶座而感到不開心,一度黑面。網民直指她露出了真性情。雖然失落后冠,事後她受訪時表示未為此失望,更說:「我返香港都冇抱好大期望,今次只係嚟體驗同玩下,有獎好開心,亦都戥冠軍林鈺洧開心,同時我獲得『國際親善大使』可以宣揚香港(覺得自己有咩做得唔好?)所有嘢都有進步空間(會唔會因為問答環節,畀志偉話擦鞋呢度做得唔好?)唔會,我對自己表現滿意,個問題係講鍾楚紅,我見到好開心,因為都有人話我似佢(之前同張光怡鬧不和嘅負面新聞影響賽果?)應該唔會,都係傳聞,我覺得係睇自己表現。」
港姐大熱梁超怡最終屈居季軍,事後她接受訪問時表示打入五強已很滿意,現時喜出望外,問到全晚最滿意那項演出時,她表示是行Catwalk,她謂:「因為條裙比較長,幸慶自己冇跌倒、有出醜。」她指現時最想吃東西,火煱、壽司、漢堡包都想吃,由美國返港的她被問到會否留港發展時,她謂:「要睇公司安排,自己對娛樂圈當然有興趣。」說到有紋身都奪獎,她謂:「相信都打破到魔咒,相當評判都會留意其他嘢!」
賽前大熱之一的邢慧敏於港姐決賽十強止步,問到有否失望時?她坦承對賽果感到少許失望:「不過大家都睇好我,好似好戥我失望咁,都要問番評判點解要淘汰我。(今晚表現有乜唔滿意地?)因為我之前做開模特兒,所以口才普通,今日喺台上冇乜機會用口才,所以我都唔知自己算乜。(有佳麗口才更差都入到五強喎!)呢啲係睇整體,評判都睇到我哋特質,之前見評判同佢哋相處,會見到佢哋某啲優勝地方。(之後會入娛樂圈發展定係做番模特兒?)都做咗好耐模特兒,都想試其他嘢,想擺脫花瓶嘅感覺。(因為受到之前負面新聞影響?)唔會,謠言止於智者。」
另外,臨完場時發生小意外,頒完所有獎項後,所有佳麗們再重返台上,其中(5)陳婉怡被紙炮擊中頭部,她即時蹲下來,再走回台中完成節目,完騷後她在後方坐下來休息,看似驚魂未定,工作人員紛紛上前慰問她,最後見她面帶笑容返回後台,相信並沒有大礙。