余香凝丟低老公囡囡飛韓國　網友讚佢韓服着得好

政府抵港防疫措施剛放寬至「0+3」，困咗幾年冇得飛嘅香港人都即刻爭住撲機票「返鄉下」玩番夠本。藝人余香凝（Jennifer）早幾日都飛咗去韓國，仲要係丟低老公同囡囡自私飛添喎！其實Jennifer今次係去做嘢啫，佢代表主演嘅電影《心裹美》去當地出席電影節，仲話用盡畢生所學嘅韓文同韓國觀眾打招呼添，不過雖然話去做嘢，但話晒兩年幾冇飛過，邊有可能唔開心呢？佢喺社交網上載片段，留言：「去旅行特別瘋狂」，片中一身韓國傳統服飾嘅Jennifer，喺韓國街頭跳晒舞咁，仲話自己係公主添，又留言：「話咗一把年紀唔會著韓服，都係著咗，仲著得好開心！」真係令人羨慕又妒忌呀。好多網友都留言讚佢着得好睇著得靚，而圈中好友徐㴓喬亦留言：「唔明你講乜？點睇都似18歲。」而陳穎欣（Yanny）就葡萄留言：「你好開心，我很羨慕」，至於林千渟就留言：「睇見都辛苦」，唔知係咪見到Jennifer玩得咁開心，自己冇得飛得個睇字所以好辛苦呢？