魏浚笙新片着得好少布 張敬軒唔輸得講明會露...

2022年09月26日 22:27
東網電視
更多新聞短片
藝人張敬軒今晚(26日)出席英皇電影《深宵閃避球》首映禮。他笑指來取經,事關自己即將開拍的賀歲片《超神經械劫案》,都是由《深》片導演應智贇操刀:「所以我嚟學吓嘢,同埋呢套戲係公司(英皇)新嘅投資,自己點都要瞓身支持。」
至於《超》片的籌備工作,軒仔不諱言:「已經九九十十喇,其實我哋已經拍緊啲嘢,都會有用嘅。今次我哋會跳拍,拍咗啲動作場面先。(你有冇操弗?)少少啦,好似手臂咁,粗重嘢就留返畀Jeffrey(魏浚笙),佢套衫布都少啲,我哋就個個都樽領。(咁你露乜?)我露兩手囉,今次同王菀之拍住一齊打出面啲人,大家親身上陣,唔會用替身,同埋要用槍,所以比較小心。(買重保險?)要問公司喎,佢哋會按規矩做嘢。」
軒仔指《超》片預算11月左右煞科:「我都希望到時會有好嘅票房。嚟緊正式開工我會萬歲,準備大家嘅膳食。依家疫情緩和,士氣都好啲,拍攝上唔會咁多掣肘。」他又表示覺得《深》片演員周家怡及李靖筠個個都出盡力投入演出,故他計劃包場支持。
他又補充:「今年英皇都同好多新導演合作,我都期待。(呢套戲總投資額幾多?)咁我又唔係好清楚,希望唔好超支啦。今年港產片反應好好,大家好捧場,呢樣嘢可以吸引更多人入行,而今次我抱住一路做一路學嘅心態。(考慮做導演?)做好演員先啦,我今次特登上堂去學戲,上咗十幾堂㗎,拍檔白只都幫咗我好多。」
另外,陳家樂剛由內地公幹返港,他在台上透露:「我好想同鄭伊健合作,今日同導演講完,聽日就有得客串,好開心呀!」