林鈺洧當選後首度回家一刻曝光　瘋狂獻吻答謝好友守候

星二代林鈺洧日前於《2022香港小姐競選》跑出勇奪冠軍，一舉一動都成為全城焦點，昨日（27日）無綫節目《東張西望》就直擊林鈺洧當選後首度回家時嘅一刻，當時其中學好友以及同屆友誼小姐邢慧敏早已喺家中守候，不但送上鮮花祝賀，仲齊齊重溫佢決賽時嘅片段，林鈺洧形容自己比賽時嘅反應好奇怪：「我應該要開心啲、靚啲！笑得燦爛啲，點解好似好迷茫咁！」佢表示未來一年會同邢慧敏並肩作戰，邢慧敏反指自己三甲不入，要「服侍」林鈺洧，場面搞笑。至於林鈺洧嘅中學好友則為佢準備一枱餸菜，令佢大為感動，即向好友們送上香吻作回禮。