鄭伊健宣佈11月開6場紅館騷　粉絲超興奮：要搶飛！

藝人鄭伊健最近除咗有新戲《深宵閃避球》即將上映外，今日（30）佢就突發喺社交網宣布將於11月21至24日、26至27日喺紅館舉行六場「Here & Now 2022鄭伊健演唱會」。伊健仲分享埋演唱會嘅宣傳短片，率先展現兩個靚仔造型畀大家睇，見佢着上金色亮片衫以及白色西裝褸，相當有型！佢仲喺貼文寫到：「好想見到大家。」唔少粉絲得知消息後都相當興奮，紛紛留言話：「要搶飛」、「超級期待」、「終於可以見到男神啦」。