孫慧雪認囝囝怕醜　謝絕母子檔上陣拍廣告

藝人孫慧雪（雪雪）日前帶同5歲的兒子Riley一齊現身商場活動，並大玩閃避球。雪雪稱對上一次帶兒子出席活動時，Riley仍是手抱BB：「囝囝好少去呢啲公開場合，我同老公前一晚仲不停教佢點答問題，囝囝性格比較怕醜，對剛認識嘅人會唔出聲。」她坦言不少廣告商邀請他們母子檔上陣拍廣告，但都被她婉拒：「工作時間太長，一般要拍4至8個鐘，老公唔捨得囝囝咁辛苦，加上囝囝怕醜，唔想佢有咁大壓力。Riley仲係BB嘅時候已經有監製想搵佢拍戲，但我都推咗，如果將來囝囝主動話想做，我先會幫佢接。」另外，雪雪有份演出的劇集《美麗戰場》將播出，她十分開心及期待，角色要橫跨20多年，甚富挑戰性。