劉溫馨再反擊　照抄「世途險惡」暗寸林正峰

無綫上位小生林正峰近日被指背游嘉欣偷嗒劉溫馨，疑似一腳踏兩船，事後林正峰發出4點澄清，更直指「學懂世途險惡，以後會更加小心。」似乎意有所指，暗示遭人擺上枱，但未幾就刪走「學懂世途險惡」字眼。事後，劉溫馨再於社交網發文反擊，佢上載多張於主題樂園遊玩嘅照片，並留言：「幫我影相嗰個人話呢，用手機影嚟講，呢幾張相直頭可以攞嚟做教材。咁當然人靚都好重要啦！係咁讚自己影得好靚！你哋話係唔係？」看似冇咩特別，但原來好戲在後頭，佢標籤上「童話世界」﹑「童真 」﹑「清者自清」﹑「自己知自己事 」及「世途險惡」等字眼，似乎間接回應林正峰，而巧合地林正峰日前都上載過去主題樂園嘅照片，未知2人係咪同行。

對此，林正峰再表示當初情緒太激動，冷靜過後覺得用字太負面，故刪去『世途險惡』字眼，亦表明係對事唔對人，並澄清去主題樂園係與友人同行，而非劉溫馨。