一日賣晒5萬8千張飛！陳奕迅跨年騷創下最「塞車」紀錄

「吹神」陳奕迅（Eason）將舉行12月紅館跨年騷，闊別9年之作《陳奕迅FEAR AND DREAMS 香港演唱會》，於今日（6日）起於城市售票網公開發售由12月9日至31日演出的共18場騷。今次為打擊黃牛每人每次限購4張門票，不過都無阻粉絲搶飛之心，今早10點開售後，由於售票情況反應熱烈，搞到購票網一度未能順利登入，出現塞車情況，需要多次嘗試先成功登入網頁購票，見Server半死嘅情況就知今次Eason個唱嘅威力！而Eason今早亦夠晒貼心咁喺社交網轉載演唱會售票資料，溫馨提示大家唔好錯過。

不過最厲害嘅係佢今次賣飛一個鐘，就已經衝上熱搜第一名，內地粉絲因為疫情關係嚟唔到，但同時亦有傳Eason會開巡迴騷，搞到一班歌迷等住見「吹神」。不過官網就澄清暫未收到《2022陳奕迅巡迴演唱會》訊息，嗌大家不信謠、不傳謠。

疫情開始至今三年間，香港未試過有一個歌手在城市電腦售票網公開發售超過4萬張飛。今日陳奕迅58,000張飛一日內賣晒，據知昨晚紅館為迎接今次Eason公售，都已經update了系統，希望可以有助疏道人流，等大家不用「塞車」太久。但今早一開賣，人潮是前所未見咁蜂擁，加上Eason希望歌迷可以得到多些機會，每人限買4張，結果城市電腦售票網，由9點開始大塞車，一度塞到網絡失寧，但歌迷並無放棄，亦為疫情以來的買演唱會飛網絡大塞車創下最塞紀錄，一共塞了13小時，晚上8點大會終於宣布：「多謝大家支持，eason 18場演唱會，已經售完。」

Eason表示：「對我和我整個團隊絕對係一個極大嘅鼓舞，我衷心感謝大家對我哋嘅支持。我哋更加會好好準備今次嘅演出，令大家可以度過每一個愉快嘅晚上。」