東方日報C2:蔣家旻成魔之路 跟張家輝學奸
20221009
東網電視
更多新聞短片
![](/hk/bkn/cnt/entertainment/20221009/photo/bkn-20221009030126125-1009_00862_001_01p.jpg?20221008235428)
蔣家旻在無綫新劇憑大奸角「反骨琪」成功彈出,她於劇中迫害家姐兼害死老竇,喪盡天良激起「民憤」,全城喊打!她坦言「成魔之路」靈感來自影帝張家輝於劇集《天地豪情》的一句經典對白,又稱見識過「心機女星」,見有記者在場即扮暈博宣傳!
早年蔣家旻憑處境劇《愛.回家》「馬子妮」一角成名,鄰家女孩形象深入民心,但她的乖乖女形象在無綫台慶劇《美麗戰場》被導演葉念琛推倒,飾演大話連篇、恩將仇報的大奸角「反骨琪」,將「家姐」陳瀅糟質得死去活來,最離譜是見錢開眼,害死一直非常疼錫她的「老竇」杜燕歌,其冷血行為激起「民憤」,人人喊打,有網民提醒她出街要小心,亦有人製作她的表情圖像洩憤。
驚出街被人打
雖然被全城鬧爆,但蔣家旻於劇集首周播出相當搶戲,加上女主角陳瀅的大反擊戲份處於鋪排階段,令到「反骨琪」人氣一時無兩,風頭完全蓋過去了法國出席時裝周缺席宣傳的陳瀅。原來蔣家旻「禽獸」一面才剛剛開始,經過首周「家無寧日」後,會選美加入娛樂圈,將會變本加厲,角色愈來愈賤格,與陳瀅上演選美風雲大鬥法。被塑造成「世紀賤精」的她接受本報獨家專訪時表示:「收到劇本其實幾興奮,可以將每個人最絕嘅陰暗面釋放晒出嚟,角色冇人性得好緊要,既然唔現實,自己更加可以去感受角色有幾咁陰暗。」
她曾在葉念琛電影《第一次不是你》飾演「阿寶」,當年首次孭飛演女主角的她獻出「第一次」有大膽激情戲,相當突破。多年後葉念琛再將她改造,變成人見人憎的角色,有機會再創事業高峰,她說:「之前冇人敢搵我做反派,係葉念琛搵我,佢只係好簡單講一個原因,話有信心我會做得到。好驚喜導演睇到我呢一面,做衰人可以盡情去做,做好人反而好難突破。」
「反骨琪」的成魔之路原來參考《天地豪情》張家輝演繹的「甘量宏」攞靈感,她說:「張家輝同郭藹明講『家咩姐啫,我姓甘㗎嘛』,抄就好難抄,就係攞呢個感覺套用去角色,去諗奸角嘅感覺係點,喺屋企不停練習,點樣可以奸啲、衰啲。開工都冇睇重播,聽到導演話『你睇吓你做得幾賤』,佢收貨就OK。」
奸角有發揮空間,抽離現實的感覺令不少演員一試上癮,她笑言:「幾過癮,都想再做多次,呢種極端嘅奸,再做想做啲深藏不露、深層嘅奸。」對於外間看好曾奪「飛躍進步女藝員」的她攞「最佳女配角」,她謙稱:「攞獎就唔敢諗咁多,希望呢個角色會係代表作。」
劇中陰招盡出的她自爆在圈中目擊過心機女「出招」:「試個有個女藝人話唔舒服,喺醫院趕返嚟拍嘢,見記者探班就突然暈低,自己仲傻更更以為佢真暈,有人提醒我唔好咁單純,話見佢捉住身邊男仔慢慢跣低,只係扮嘢。真係好勁,為咗造新聞去搞一場大龍鳳!」
葉念琛安排「洗底」
此外,蔣家旻昨日到電台受訪,問她現在出街可會小心﹖她笑言:「好彩出街冇被人打,導演都叫我唔好出街,連公司保安見到我都話睇到好激氣。好開心有咁嘅反應,亦好多謝導演,劇情寫得好中,寫到咁極端地衰。」而葉念琛表示很開心劇集於網上討論區被「洗版」:「主要都係鬧蔣家旻,最開心係有noise,收視都唔及全部人去講咁緊要。」他笑言下次再找蔣家旻拍戲,會安排好人角色讓她洗底。問到陳瀅缺席劇集宣傳可有影響?他說:「對佢嘅行程好清楚,其實佢之前都做咗好多宣傳,同埋下星期佢都會歸隊。」
更多新聞,請瀏覽東方日報網頁: