勸爆料者收手︱林鈺洧被迫早熟 13歲離家打工養自己

20221012
東網電視
更多新聞短片
「星二代」港姐冠軍林鈺洧父親是林俊賢,惟其父母早已分開,故她小時候家境麻麻,因而變得早熟,13歲已搬離屋企,靠着幫人補習及做侍應,自己交租過獨立生活,年紀輕輕已做過多個行業。對於一夜成名後受到連環爆料狙擊,她直言對「二五仔」的身份心裏有數,更勸對方「收手」。
港姐冠軍林鈺洧的爸爸是前無綫小生林俊賢,選美時一舉一動特別受注目,得獎後更惹來連串是非狙擊,先被翻「性史」舊帳,被網民封為「性女港姐」,後來更被閨蜜爆料指她欠下50萬卡數,要靠獎金「填氹」,另有爆料指她曾「踩場」找情敵晦氣。面對一浪接一浪的負面新聞,性格樂觀的林鈺洧直言壓力很大,自己不是外間所看般硬淨,自言軟弱,對於不是事實的指控感不快,但相信觀眾眼睛是雪亮,望時間能沖淡一切。
擔心嚇退追求者
當中令她最不開心的是被指「性女港姐」,因為此外號影響其人格,令她道德「清零」:「都擔心嫁唔出,如果唔識我,睇到報道可能都唔想了解我,睇到呢啲新聞邊個會嚟追求我?嗰個節目係一個工作,大家開會傾夾好講乜,再澄清過去冇5個男朋友咁多,只係得3個。我亦冇去罵戰,自己唔係剛烈嘅人,又話我欠卡數,以前信用額得一萬,點簽到50萬呢?依家連信用卡都冇,鍾意用現金。」對於爆料者的身份,她坦言心裏有數:「希望佢唔好再咁做,總之係假新聞。」
在單親家庭長大的她至15歲時,爸爸才尋親認女,現時父女關係似朋友,林俊賢曾以過來人經驗開解她,她說:「佢知我唔係咁,話做呢行,仲要係冠軍,就梗係多是非。好辛苦,但係都頂得順嘅,亦只能夠接受。」講到自小缺乏父愛,可有遺憾?她說:「細個媽咪冇講,連爸爸個名都唔知。爸爸朋友喺社交網搵到我,15歲先認識我爸爸,第一次見面覺得好似一份禮物咁,有多個人錫我,亦冇嬲佢。第一次見面好記得佢仲遲到,嚟到就Hello,佢話:『我係你爸爸。』我就話:『係你呀。』」她笑言與父親相認後被媽媽「詐型」,夾在中間的她難做人。
老竇林俊賢:非常遺憾!
林鈺洧小時候家境麻麻,她覺得是另類體驗,亦從未埋怨過父母,而她入行前做過補習、侍應、私人秘書、翻譯及售貨員等,並透露13歲已經搬離屋企,半工讀獨立生活:「13歲已經搬咗出嚟住,幫人補習、喺灣仔做侍應,冇人知道我咁細個。嗰陣啲租好平,自己交租照顧自己,當然媽咪都有照顧嘅,佢都想我獨立啲。」身為港姐冠軍,但只得專上學歷,她直言曾有升大學讀心理學的機會,更獲得一半獎學金,但因學費實在太貴而放棄學業,她揚言將來一定會重返校園,而自身經歷亦令她想做慈善工作幫助別人。
林俊賢對女兒因金錢問題未能讀大學,他表示:「非常遺憾,15歲先見番佢,如果個環境許可,佢係有心嘅話,隨時可以讀番(大學);至於佢喺社會做過咁多嘢,向好方面諗,可以得到唔同方面嘅經驗,都係一件好事。」
許子萱跟張曼玉學嘢 梁超怡搵佘詩曼做榜樣
港姐亞軍許子萱與季軍梁超怡皆由外地回港選美,得獎後直言會留港發展,勇闖娛樂圈。「學霸」許子萱獲得劍橋、牛津取錄修讀MBA,問到要由零開始發展演藝事業可會是大犧牲?她說:「細細個睇港姐,所以想嚟圓夢,亦都想趁後生試吓做主持、拍劇,長期嚟講都會想去讀書完成學業。」
選美期間傳出她與佳麗張光怡因排舞問題鬧交,令人覺得她相當好勝,她說:「唔係好勝,只係自己知道想要咩,時代唔同,睇到有啲評論叫我唔好咁自信,但係覺得女仔靠自己努力、實力,冇乜問題,由細到大都會畀自己壓力,因為唔想令身邊人失望。」她又視同屬亞軍的張曼玉為榜樣:「佢講過明星只係一時,演員先係永遠,覺得佢好敬業,唔止係明星,係想將演藝事業做好。」
至於梁超怡對於來港發展過獨立生活,她指讀書時已習慣自己照顧自己,加上在港有親戚,相信不是問題。童星時曾拍攝電影《無間道》飾演梁朝偉女兒的她最喜歡的演員並不是「爸爸」,她說:「自己最鍾意佘詩曼,佢又靚、做戲又叻,會以佢為榜樣。」