美麗戰場︱陳瀅自製私密相冊吸客　網民狠批低分作

由葉念琛編劇、導演及監製嘅TVB劇集《美麗戰場》，搵嚟一班女神陳瀅、陳曉華、劉佩玥、朱晨麗及蔣家旻演出，依家「反骨琪」蔣家旻憑扮壞女人而最先跑出，不過一眾女神都不甘落後，尋晚（11日）陳瀅與劉佩玥就連線開Live，佢哋就晒出自製私密相冊，當中有陳瀅、陳曉華及劉佩玥三姐妹由細到大嘅相，陳瀅仲好興奮話：「有我哋小朋友嘅造型啦，一路到讀緊書嘅時候！」大方割愛嘅陳瀅，強調入面啲小朋友相係真係佢細個啲相嚟，陳瀅更問觀眾：「我係唔係好可愛呢？」力證自己至小已經係美人胚子。陳瀅仲話到《美麗戰場》完結後，就會同觀眾玩遊戲，到時更會將呢個相冊送出，睇吓到時邊個會咁幸運！

雖然佢哋瞓身宣傳，又被稱為「港版《Penthouse》」，不過仍被部分網友大鬧劇情狗血，內地網站評分更僅得5.1分，口碑不如預期，成為今年TVB劇集當中，目前為止評分最低分嘅劇集。而其他劇集評分，亦有年頭播映嘅《家族榮耀》得5.7分，2020年播出、曾創下40點收視嘅《法證先鋒部IV》，亦只得5.1分。