張敬軒拎「大支嘢」出巡　又大又粗惹粉絲尖叫

「軒公」張敬軒近日正忙於拍攝英皇賀歲喜劇《超神經械劫案》，向來深受粉絲愛戴嘅佢，開工時不但引來大批粉絲探班圍觀，仲送上應援飲品，而張敬軒亦非常識做，休息空檔特意行近粉絲堆，手持大炮型爆出巡，開放任影唔嬲，仲不時高舉道具槍作勢「射」粉絲，Chok到爆令粉絲尖叫連連，其公司社交網上載當日片段，並留言笑指：「為咗多謝各位澱粉嘅照顧，有成哥（張敬軒戲中角色）趁拍戲空檔偷偷地走出嚟，佢仲帶埋自己嗰枝大支嘢同大家見面，今次真係大支嘢吖！睇見佢咁強勁嘅臂彎孭住枝迫擊炮，一睇就知係堅㗎喇，又大又粗，真係搞到人垂涎三尺。有成哥咁玉樹臨風就請大家繼續支持《超神經械劫案》！」