古天樂被傳神經全壞死　本尊親回：我鋼鐵造！

影帝古天樂昨晚（18日）現身《明日戰記》謝票場，想不到今日卻有報道大字標題寫上「51歲古天樂驚證實『神經全壞死』！急入動手術，右半邊劇痛麻痹」，消息想當嚇人。

本月21日將迎來52歲生日的他，對於這類新聞見怪不怪，並於社交網親回：「今日突然收到好多問候關心，但又唔係同我講生日快樂。大家放心，其實報道標題係有啲嚇人，我喺訪問係話幾年前醫生講再唔處理就神經壞死呀！幾年前做完手術加咗鈦金屬喺條頸度，之後我已經好番哂喇！所以我之前咪話咗我係鋼鐵造囉！」