場面冷清︱姜濤回港行秘道　姜糖聽話唔接機零混亂

MIRROR自7月底紅館騷發生意外後，一度休團兩個月，直至今個月逐漸復工，12子重新活躍社交網，而人氣王姜濤早前趁復工前與家人到法國巴黎旅遊再轉飛英國，今日（19日）終於現身香港機場。雖然姜濤一早已經喺社交媒體發文勸粉絲唔好嚟機場接機，怕製造混亂兼怕嚇親家人，加上佢會行特別通道，不過仍有少數姜糖都現身接機大堂，博一博可以見偶像一面。

現場有警員及機場特警等約10多人戒備，加上現場多名記者守候，似乎姜糖都好聽話未有到場等候見姜濤，只有約十數名姜糖出現。今早（19日）9點49分，姜濤與家人由機場管理局安排經特別通道步出機場，姜媽首先步出並與在場記者揮手，姜濤緊隨其後向記者揮手、點頭及合十打招呼，亦有應要求回頭給記者拍照，之後一行人便乘座七人車離開。

今早所見，於姜濤到埗前，機場工作人員於特別通道出口外架設記者區供記者採訪，警方及機場保安亦有派員在場守候，當姜濤準備步出前數分鐘，機場職員更架起鐵馬封閉部分行人路，方便姜濤一行人可迅速登車離開。

而MIRROR成員Anson Lo(盧瀚霆)、Jeremy(李駿傑 )及姜濤先後旅行返港後，一眾成員亦會陸續復工。姜濤、Ian（陳卓賢）、Stanley（邱士縉）、Edan（呂爵安）4子亦會率先自事件後正式復工，出席今個星期五（21日）舉行的ViuTV劇集《季前賽》的記者會，期間，他們更會進行籃球比賽。