【磨刀教學】謝高晉實測超易上手　簡單步驟極速磨利刀

正所謂「再鋒利嘅刀都有生銹嘅一日」，但屋企用嘅刀好多時都只係用到鈍咗，好少生銹嘅，只要磨番利佢就得啦！不過用錯方法磨刀嘅話，分分鐘愈磨愈鈍，所以今集《跟琪流行》主播嘉琪就帶埋歌影視三棲發展嘅謝高晉上堂學磨刀，想學嘢就一定要睇片喇！

同時身為甲一籃球員嘅謝高晉除咗運動叻之外，原來仲識煮嘢食，不過今次搵佢一齊學磨刀，完全因為畀佢首新歌《謝絕關心》嘅一句「謝絕你關心　開刀請你趁早」洗晒腦，謝高晉表示呢首歌係講緊三角戀關係：「想帶出如果一段關係出現咗裂痕，其實大家真係好需要自我沉靜，如果要放下就真係要磨利把刀，斬斷有害嘅關係！」

雖然謝高晉有下廚經驗，但磨刀都係第一次，嘉琪更係刀都唔識揸，不過經導師Colin傳授基本磨刀技巧後，兩位新手都成功將把鈍到變成間尺嘅刀磨利。當中只要幾個簡單步驟，包括將刀嘅兩面分別磨出毛邊（Burr）以及去毛邊等，熟手嘅話唔使5分鐘已經可以磨到把刀非常鋒利！聽落係咪好容易呢？想學就要睇今集《跟琪流行》！

場地：BLADE n BEANS