MIRROR意外後首合體！Stanley眼濕濕　姜濤：想像唔到阿Mo心情

男團MIRROR自紅館事故後，休團了2個月，今個月開始逐步復工，先後派出新團歌，成員又有廣告推出，由姜濤、陳卓賢（Ian）、呂爵安（Edan）、邱士縉（Stanley）及ERROR的193、肥仔等主演的ViuTV原創劇《季前賽》將於下周一播出，今日（21日）在啟業邨一個籃球場宣傳ViuTV新劇。活動上由姜濤率領的癡漢隊，成員包括張繼聰、郭嘉駿（193）、梁業（肥仔）、Edan、Stanley，與由Ian率領的翰林大學隊，包括袁劍偉、葉振弘、吳啟洋、陳安立、黃定謙，即將進行激烈的籃球比賽，互相較量球技，場面好熱血。

姜濤現場表現較Hea，腰圍較圓潤，但亦成功開齋入了1球。Ian射入一球靚3分波，Stanley都不錯，入了1球。Edan雖然無入波，但落力跑足全場。最後姜濤Edan和Stanley的「癡漢隊」輸了，被罰彈額頭。

自從紅館墮屏意外後，姜濤、Edan、陳卓賢及Stanley首次開腔接受訪問，講到復工心情及情緒是否已平伏，Edan表示每個人心情都不同：「係好複雜，大家要時間去消化，呢段時間亦諗多咗嘢，大家同公司傾過，覺得2個月出返嚟工作，都係經過公司評估，依家可以出來工作會畀心機。」姜濤坦言前一天晚上睡覺時很緊張，因為相隔兩個月之後第一次面對如此多的傳媒，但認為始終要收拾心情，Ian謂需要好好調整自己：「第一次同大家見面，有咁長時間冇工作，沉咗咁耐，要整頓吓思緒。」Stanley亦表示心情都要慢慢平復，很難當沒有事發生過：「要慢慢Pick Up番，自己都未習慣，因為太耐冇見大家，公司都跟緊我哋情況。」

問到他們這段時間可有發噩夢？Edan說：「自己有段時間比較多嘢諗，點解會咁，但耐咗應該可以慢慢會好，唔會再有唔舒服情況發生。」姜濤坦言：「我一直喺度諗，呢個唔會係短時間能消化到嘅事，我唔夠膽去諗，我想像唔到傷者阿Mo的心情，但冇辦法，要一段時間，先可以收拾到心情。」

最激動的Stanley眼紅紅，淚珠在眼眶滾滾吓，他坦白說：「發生呢件事好難入睡，要慢慢平復情緒。（成日喊？）可能因為自己喺同一個表演，亦都喺嗰度（跳舞）出身，所以係比較再上心啲，公司都好好，請咗醫生顧問團隊嚟評估我，經評估我嘅情緒屬於正常。（你以為自己有情緒病？）我冇啲好嚴重反應，經評估後我反應屬於正常。」

Ian因情緒未Ready好而推掉一部電影，他坦白說：「自己第一個作品比較緊張啲，當初接戲8月就要決定，我覺得需要揣摩呢個角色，要投入拍戲，但嗰陣時我係做唔到，嗰邊電影公司話等我，但我覺得冇理由要全部、百幾人等我一個，咁會拖累到進度，我亦唔知10月自己個狀況係咪OK，因為我想做到百分之二百最好。（依家準備好？）好難完全準備好，始終需要沉澱。」

而姜濤早前跟家人到外地旅行，被網民質疑做法不恰當？他坦言知道，但沒有辦法：「我好想離開呢個地方，而且我應承咗同家人去旅行好耐，我都考慮咗好耐。」此時，姜濤講不下去，Edan即時助對方解圍接力說：「外界對我哋嘅關注度好高，出外會容易啲平復思緒。」近日傳出Edan與文青女神袁澧林拍拖，問到Edan是否有女友陪渡難關？他作出澄清：「嗰個係假，唔係嗰回事，我唔係喺佢屋企影相，我都聽過個傳聞，只不過係佢同我合作次數比較高，總之啲相背景唔係同一個方，唔係佢屋企。」

問到是否有探過受傷舞者李啟言，Stanley稱很想探望對方，但醫院限制探訪人數，加上覺得並不適合，所以未有到醫院探望對方。提到網民不滿其公司遲遲未有就意外事故好好交代？Edan表示明白大家想法：「我明大家想法，點解一直唔出聲明，公司係有做好多嘢，依家係司法程序，所以唔可以好公開講好多嘢住，公司一定會畀個答覆大家。」

提到AK粉絲不夾錢宣傳團歌，Edan稱自己不清楚，但不會因為咁內訌，Stanley稱大家都是為12個好。對於公司唔畀錢宣傳，要粉絲出錢是否恰當？姜濤表示公司投資主要在個人培訓上，至於宣傳上，公司有自己計劃：「而且我哋實力仲有進步空間，想我哋做好自己先。」