香港小姐再競選︱麥皓兒一年激減40磅　回復24吋纖腰應戰

港姐出身嘅藝人麥皓兒近日參加無綫真人騷《香港小姐再競選》，亦係候選佳麗中年紀最大一位，但佢不但Keep住童顏，拍埋去其他20出頭嘅佳麗完全零違和，昔日曾身形暴漲、體重高峰期一度達145磅嘅佢更瘦出新高度，然保持住24吋纖腰，仲喺一年內減足超過40磅，今次更以泳衣及運動Bra Top上陣大晒收身成果，佢表示：「我主要做運動、冇乜節食，咁可以更有效提升代謝率，除咗每日做兩至三個鐘帶氧運動，仲額外會做肌肉訓練。」

而早前透露出歌圓夢成樂壇新人嘅佢，更喺才藝表演環節又唱又跳，展現唱功技驚四座，佢感激男友「蔥頭」丘梓謙給予不少實際支持：「今次我才藝表演係跳唱，我自己練習時，佢有提點我邊啲動作會Smooth啲、好睇啲。同埋佢再冇引誘我食嘢，佢係油浸都唔肥嘅類型，之前成日話煮消夜畀我食。」不過其實佢初時對比賽略帶猶豫，後來竟因皮膚關係獲製作組睇中及支持參選：「佢哋話我啲皮膚好年輕喎，都多謝佢哋。」