白雲考美人魚教練牌　水底除罩擺甫有難度

女星白雲最近到了內地考美人魚教練牌，去年她在朋友介紹下開始玩人魚潛水，並跟「40億千金」蔡頌思合辦了香港水下表演藝術協會，她說：「我哋搞呢個協會都係想發展水下表演藝術，我想專業啲，可以教到人，所以就考埋教練牌。今次我跟女教練何灝浩學習，佢好犀利幾乎係全中國第一，好多水底表演拍攝都係搵佢。我想一次過晒考，所以花咗好多時間練習，每日朝早9點半上堂，平均上4至6個鐘，有理論堂、形體堂等等，都幾辛苦。」

除了上堂外，她邀請了著名攝影師汪寧坤為她拍攝水底照：「如果將來要教學生，都要影啲靚相畀人睇吓我可以做到咩動作，亦要幫學生影相，所以得閒就要去唔同地方影潛水相。」她在鏡頭前動作優美，看似輕鬆，但事實上並不容易：「每次都要影3個鐘左右，而且好難，要控制自己嘅身體喺水中唔可以亂郁，同埋要擺到不同動作，我有啲相除咗面罩，又要閉氣同張開眼，同時要兼顧好多嘢。」