姜濤肥仔白背心摸面互扭　致敬《春光乍洩》

由張繼聰與MIRROR成員主演嘅ViuTV劇集《季前賽》，依家播到有「阿孝」姜濤嘅失蹤媽咪「孝媽」童愛玲現身，不過姜濤不滿對方當年拋自己同細佬，於是趕佢走。但「豬潤」肥仔為童愛玲幫口，仲搞到同姜濤發生口角，肥仔終被姜濤嘅說話Hurt到，所以暫時去「河馬」葛綽瑤嘅中醫館寄宿。

其後二人和好，姜濤去中醫館搵着住白色底衫同短褲嘅肥仔並道歉，點知姜濤忽然輕撫肥仔臉仔，又向對方作出承諾，最後二人跟音樂跳舞，畫面似足王家衛作品《春光乍洩》！肥仔嘅獨舞、姜濤對白「如果我屋企仲有一張床位」，真係向《阿飛正傳》及《花樣年華》致敬。估唔到呢一幕令粉絲起哄，向來姜濤同肥仔就多合作，依家轉玩HeHe一樣受落，仲笑言姜濤望住肥仔嘅眼神仲深情過佢望住劇女友葛綽瑤。