執生講天分︱鄭裕玲讚鄭丹瑞亂噏功力深厚

無綫節目《全能司儀選拔大賽2022》中，上周率先入圍5強的分別為梁珈詠、王鎮泉及蔡國威，明晚（10日）播出的一集，上演最後兩組對決，分別是黃建東VS梁菁琳，以及黃頌明VS吳紫韻，最終有兩位晉級5強，而5強參賽者，將接受嚴峻考驗，包括與鄭裕玲（Do姐）合作Live騷考執生功力等，決賽更邀來鄭丹瑞及森美擔任評判。

其中最刁鑽的，是Do姐在製作組要求下，不跟稿讀及瘋狂爆肚，以考驗參賽者臨場執生能力，而林盛斌和陸浩明負責搞搞震擾亂直播，包括亂畀指示。鄭丹瑞看完Do姐的大考驗後，即忍不住笑說：「我喺度諗，如果係我同Do姐喺度做緊，佢喺度亂噏嘅話，我會點做呢？」Do姐聞言即反擊：「你梗係掂啦，你都亂噏嘛！」鄭丹瑞更分享難忘的執生經歷：「有一年港姐準決賽，有個港姐望住我求救，原來台上有個港姐見暈，當時我講完我要講嘅嘢後，就即刻衝過去，啱啱好及時趕到扶住位佳麗。所以做司儀最緊要『眼觀四方、耳聽八方』！」