吳紫韻赤腳行38K　貼保護紙都成腳損晒

藝人吳紫韻（Purple）近日聯同5位女藝人接力圍繞香港赤腳行，為慈善機構籌款，Purple透露：「我哋每人行30幾公里，第一棒係余曉彤，我係第二棒，我行咗38公里，我對腳板係貼咗塊粉紅色嘅保護紙，比膠布更薄，令我對腳冇咁易整損，但行到10公里個保護層已經爛咗，所以我對腳板都行到損晒，今次赤腳行係因為要幫山區好窮嘅小朋友籌款，佢哋係冇鞋着咁行返學，雖然今次行嘅過程好痛苦，對腳行到又損又腫，但諗起班小朋友，都好想帶出呢個訊息。」

Purple指沿途得到不少粉絲支持，早上七時已有粉絲送她咖啡，有粉絲送食物，有的帶同愛犬陪她行，其中一個粉絲更陪她行了20公里，過程相當熱血：「行到最後10公里，我見到條山路，即時忍唔住喊，當時我已經行咗12個鐘，覺得好崩潰，後來關曜儁嚟咗陪我行，佢仲陪我赤腳行，最後四公里我哋瘋狂咁跑，我同關曜儁係拍《不可能任務》時相識，佢真係好有義氣。」