着睡袍對撼！G.E.M.變兔女郎賣萌　歐陽娜娜單眼電到暈

歌手鄧紫棋（G.E.M.）「閉關」歸來後重新活躍社交網，呢日佢激罕公開睡袍照，大解放派福利。相中見佢以白袍由頭笠到落腳，雖然冇咩睇頭，但勝在睡袍連住兔仔耳設計嘅連身帽，令G.E.M.即時可愛度爆燈，少女味出晒嚟。原來G.E.M.今次罕有着睡袍示人，係同好友歐陽娜娜有關，事關呢件睡袍正正係歐陽娜娜主理嘅個人服裝品牌嘅出品，而歐陽娜娜自己亦做埋生招牌，落住睡袍單眼放電，為咗宣傳相當落力。之前歐陽娜娜為G.E.M.拍MV，今次就輪到G.E.M.幫對方做「Model」，可見2人感情甚好。