林盛斌百足咁多爪　玩埋吃播狂掃大閘蟹

藝人林盛斌（Bob）早前憑劇集《美麗戰場》「徐富貴」一角人氣急升，百足咁多爪嘅佢不但演戲、主持同樣出色，更涉足投資便利店、網購及經營自家拍片頻道分享生財之道，絕對係全方位藝人，日前佢仲玩埋「吃播」，孖住帶貨女王 ViVi直播狂食鮑魚、蟹粉皇及大閘蟹等當造美食，令網民睇到食指大動，高峰時期高達2千人同時收睇直播，期間Bob更發揮急才，即興將食品大混雜，調配出豪華撈麵，仲話要改名做「Bob爺撈麵」，相當搞笑。