傳申請唔畀家人照顧費　王力宏豪租酒店級豪宅自住

台灣天王王力宏同李靚蕾離婚官司仲未打完，當中王力宏停工1年就似乎準備「解封」，佢個名出現於內地節目《天賜的聲音》第4季擬邀嘉賓名單中，隨時有機會「復出」。不過台灣方面就有消息指，王力宏11月向台北法院提交申請書，指佢因演藝工作中斷，無法支付家人照顧費，同時再有爆料指佢最近入住5億元新台幣（下同，約1.25億元港幣）起跳嘅「文華苑」豪宅，惟王力宏同李靚蕾對此都未回應，不過台媒就發現王力宏冇申請免除給付等案件。

據了解，目前王力宏同李靚蕾只有親權案件於法院審理中，並冇申請免除給付等案件。據悉，王力宏每月支付95萬元（約23.81萬元港幣）嘅家人照顧費，一分都沒有短少。而文華苑係租嘅，就係為咗同家人見面時，等家人住喺好似「吾彊」般嘅豪宅環境裏。

佢依家租緊嘅文華苑屬於台北罕見豪宅，隔籬係5星級知名酒店，所以屋苑都會提供同酒店同等級服務聞名，配有24小時微電腦淨水系統提供住戶良好水質，據悉每1戶單月管理費13萬元（約3萬港幣）起跳，每月租金推估達45萬元（約11萬港幣）。