黃德斌加戲錫練美娟額頭 自爆劇中夫妻激情戲甚多

2022年11月22日 22:01
東網電視
更多新聞短片
黃德斌和練美娟(娟姐)在新劇《百萬同居計劃》中飾演一對恩愛夫妻,德斌大讚娟姐條件好,大有市場,娟姐終甜認破dry有拖拍,有愛情滋潤寧舍Sweet。
自《大叔的愛》後,《百萬同居計劃》是德斌和娟姐第二次的合作,早前2人受訪,先互笠高帽,娟姐稱今次有德斌這個具男人味的「老公」,是對她的恩賜,會寫入CV存檔。但笑言擇偶的話,卻一定不會㨂德斌:「唔想日日擔心畀人搶走個老公,靚仔只可遠觀不能褻玩。我呢種做太太就好,外表一般,但有內涵,相處會愈來愈鍾意,值得擁有。」德斌認同娟姐值得擁有,更讚娟姐「Body好有市場。」差不多5年無拍拖的娟姐,洩蜜認有男友:「依家感情生活美滿,發展中,對方係圈外人,開始咗幾個月,幾好,不過唔知對方係咪都覺得好,開心最緊要。」問她會否在主持的真人騷上分享自己的戀事,她卻怕醜表示待穩定些再說。
德斌提到與娟姐能互相信任,像其中一場戲,他臨時加戲錫了娟姐額頭,效果自然,導演也叫好,她笑言不介意再加錫戲,並爆出劇中夫妻激情戲甚多,笑言是一齣「動作片」。一向較多做綜藝主持的她,亦享受拍劇讓她扮演不同的身份。
德斌先後在ViuTV拍了三部劇,套套都做主要角色,他表示沒有規範自己,像最近一齣電影只有一場戲,笑言「嗰場戲我係主角嘛!」只要拍得開心不介意戲多戲少。他讚劇中的魏浚笙(Jeffrey)和柳應廷(JER)都有獨特個性,第一次合作的Jeffrey,形容他是充滿能量的小朋友,好開放,很健談。德斌自言不善辭令,自嘲是「話題終結者」,他說:「好多人叫我講多啲嘢,因為我唔出聲個樣,皺埋眉啲人會驚,依家慢慢改變咗好多。」
黃德斌服裝: Norda by Trail Sport
妝頭: Kelly Mak by Headquarters
練美娟服裝: SPORT b. by agnès b.
妝頭: Judy Cheung & Denny Mok