岑珈其謝雪心結片緣 經典角色重現眼前

2022年11月24日 02:01
東網電視
更多新聞短片
亞視經典劇集《我和殭屍有個約會》相隔24年將再次登場,並由掌舵人陳十三身兼編劇及導演開拍電影版《驅魔龍族馬小玲》,除了由黃宗澤飾演「況天佑」、蔡潔則飾演「王珍珍」外,另一重要角色「金正中」,由岑珈其出演,珈其月前於網台節目《我和殭屍有個誤會》劇場版內,已曾扮過「金正中」一角,獲不少網民稱讚還原度高,陳十三亦覺得珈其非常脗合角色,決定邀請珈其參演。
珈其日前剛在馬來西亞拍完電影《千謊百計》返港,前晚(23號)隨即投入《驅》片拍攝,珈其演的「金正中」與電視版的不相同,電影版的「金正中」是個不學無術的宅男,只想做網紅,謝雪心就飾演其母親,珈其說:「成日同阿媽 (謝雪心) 講諗到啲好主意,我哋拍條片就成功就會爆紅,成日唔想努力,阿媽就想佢搵啲嘢學下。」珈其以「玄武童子」造型拍戲,他笑說:「係講我好叻、識法術,但其實係扮,但過程我扮得好有自信好犀利,其實平時嘅『金正中』係冇乜自信,又懶,乜嘢都唔叻嘅一個𡃁仔。」
珈其在小時都有睇過《我和殭屍有個約會》:「係我兒時一套經典到爆嘅電視劇,黐線,覺得點解可以咁勁嘅。」在旁的謝雪心問他「你識睇嘅?」珈其說:「嗰時會追㗎,但嗰時唔識得細味成套劇,但都會諗點解識得諗呢啲題材嘅?殭屍喎,好型喎,好鍾意。」他指最鍾意電視版《殭屍》的「馬小玲」,覺得這個角色很經典、很吸引。劇集版的「金正中」母親由吳浣儀演出,電影版的金母角色就由謝雪心飾演,心姐稱其角色太溺愛兒子:「錫到有啲縱,因為家庭環境好現實,老竇又唔生性,獨力湊佢供書教學,點知佢想做網紅,咁我又隨佢癲好幫佢,但我哋都係唔叻嘅神棍,搵唔到錢,都幾得意。」