何泳芍踩板踩上癮　挑戰高難度滑落樓梯

藝人何泳芍(Honey)下月有份參與演出《歡樂滿東華2022》慈善騷，將夥拍郭柏妍和邵珮詩等表演滑板，Honey本身有潛水教練牌，可能做開運動關係，故學習時較其他女仔易上手，其實幾年前她透過網上自學過踩板，故對滑板略知一二，尤其擺甫士最叻，她說：「前幾年覺得踩板好型，就上網自學，所以擺甫士好似好叻，可以用腳一踩就彈起塊板。」今次公司安排了專業教練指導，才發現原來自己有好多壞習慣，企姿和步姿也不太正確，故要從頭學起，經教練指導下，她愈學愈感興趣，之後都想繼續研究。

而練習期間也難免會跌倒受傷，手㬹和膝蓋都擦傷過，她自言不怕痛，每次都好期待教練教授新招式，希望能夠在演出前學好，據講是次演出難度頗高，有跳樓梯等危險動作，問她家人會否擔心危險，她笑言本身無跟家人提及，說：「我屋企人都習慣晒，慣咗我成日做危險嘢，我媽咪心臟好強大，管唔到我。以前我去考自由潛，一個人喺菲律賓40幾日，媽咪都淨係同我講咗一句，叫我唔好咁搏。」她大讚媽咪犀利，笑言將來若有個女日日做危險事一定會好擔心。