煞科後突然要補拍除衫戲　魏浚笙認食肥咗急操肌補鑊

小鮮肉魏浚笙（Jeffrey）今日（24日）現身尖沙咀手機聯乘活動，提到他有份參演的電影《超神經械劫案》日前煞科，近日突收到通知要補戲，原本他好開心，因為可以再見成班劇組好友，但他表示：「點知場戲我要除衫，當堂唔開心咗，因為煞科後食咗十幾日，食咗好多澱粉質，要縮肚。」他希望練出肌肉，故要求給他兩周時間操肌，並表示已入定雞胸，這段時間將無啖好食，預計聖誕前完成，他笑言聖誕便可以吃大餐及看燈飾，希望過一個暖暖的聖誕，向來錫女友的他，冇諗送禮物，但想計劃一同出埠旅行。

提到韓國女團BLACK PINK開售明年在港舉行的演唱會，網民大鬧網絡癱瘓未能買飛，原來Jeffrey亦有上網撲飛，見好快售罄便放棄，戲言人生從未試過撲飛成功，聞黃牛飛抄貴至22倍，他就呼籲大家不要買黃牛。至於張敬軒將舉行會展跨年騷，他知道軒公因為演唱會飛的問題與父母鬧交，故不想打擾對方，他說：「不過上次Kaho（洪嘉豪）開騷，預晒我哋全部劇組，Kaho開咗個靚頭，軒公識做啦！」