超能使者︱王君馨臥底身份揭盅　陳展鵬慾火焚身咀唐詩詠

王君馨在無綫台慶劇《超能使者》中亦正亦邪的身份終揭開，表面是黑幫大家姐的她原來是警隊臥底，網民讚她未能救活上司林偉一幕相當好戲感人，監製則認為她將霸氣大家姐演得入型入格。她受訪時表示好開心近日出街獲不少途人稱呼為「韋小姐」，十分感激觀眾支持：「呢集心情非常矛盾，所以喺演繹上，最困難係情緒轉變同心境變化，幸有兩位非常之好嘅前輩林偉哥同瑞偉哥喺度，令我好易就入戲。」

而昨晚兩對CP皆有咀嘴戲，劉穎鏇與陳山聰被困在冰櫃一幕終於冧爆錫錫，她以疊字撒嬌說：「抱抱...攬實啲！凍凍呀！」她受訪時指私下較男仔頭，故沒有講過疊字：「我未試過咁樣對人撒嬌，所以拍攝時都有少少尷尬同怕醜。」講到咀戲Tiffany坦言兩人多次合作已變熟落，故今次拍咀戲也不尷尬，事前亦食定香口膠作準備，她說：「佢真係好似一個哥哥咁，令我好放心同信任佢，感覺仲幾得意添。」而陳展鵬則被阿媽的「有料糖水」搞到全身㷫烚烚，更對唐詩詠蠢蠢欲動，誤會被暗戀的她竟主動獻吻兼表白，但結果再遭請食檸檬，場面搞笑。