王菀之聲演「機鐵仔」錄歌超興奮:希望大家去旅行都會諗起!

2022年11月24日 20:01
東網電視
更多新聞短片
歌手王菀之(Ivana)最近獲邀聲演機鐵仔,錄製不同的車站廣播,今次同機場快綫合作,Ivana表示十分開心,指三年冇去旅行,坦言同大家一樣想飛,掛住日本、冰島及好多地方,所以她錄音個陣唱到「嚟緊飛東京,食壽司天婦蝦,每日行街睇新衫,買到喼都爆埋....」笑言個心已經在東京,錄完音之後仲即刻獎勵自己,去食了「天婦蝦」。
問她可有計劃去旅行?她坦言要過埋12月:「手頭上仲有好多工作,試過想偷走幾日,但最終都係失敗。做埋下月頭同Serrini個騷先可以諗,無論係點,下年年頭都會飛啦,因為我要去美國工作同演出。之後希望可以走多轉東京,我三年冇去啦,已經諗好晒去邊。」
她覺得機鐵仔好得意,跟她一樣圓碌碌,隻眼又係得一點,自嘲:「佢同我好似樣。」她更獲免費贊助搭機場快綫,她說:「諗起第時搭會聽到自己把聲,會覺得好得意,可能會忍唔住跟住唱。」她亦主唱機鐵仔最新單曲《飛得去旅行》,歌詞搞鬼得意,她笑說:「隻歌嘅歌詞改編後,令人有好多去旅行嘅幻想,錄音時一路唱個陣,我都唱得好開心,希望能夠成為大家日後去旅行,每次執行李都會諗起嘅歌啦。」