193承諾奪「叱咤組合獎」裸跑 ERROR隊友提議拍AV造勢

2022年11月25日 20:01
東網電視
更多新聞短片
組合ERROR今午(25日)出席「ViuTV 2023節目巡禮」,席間他們衝落台向觀眾大派禮物,包括《季前賽》的海報及波衫,深受歡迎,而台上成員193被指倘若ERROR能奪「叱咤組合獎」,則會於演唱會裸跑謝票,他當眾「三級」回道:「咁表演啲咩呀?格劍呀?」事後4子齊齊受訪,問到有否信心得「組合獎」,他們坦言暫時信心不夠強:「所以我哋一直搵緊宣傳攻勢,去增強威力,193承諾裸跑嘛。」193即回道:「咁如果以後我競逐『最佳男歌手』做啲咩?要切嘞喎!」其他3子提議:「到時你拍套AV囉,攝影師、收音我哋幫手!裸跑啫,你有操開。」193:「操乜呀,請問?攞出嚟摑你哋!」3子再接口:「我哋唔介意你攞『大笨象』彈我哋!」
193再說:「我想收番裸跑囉,時序上都唔啱,我哋個騷12月中舉行,叱咤係明年1月。都未頒獎,好合理地走數,咁一係再開下個騷先裸跑啦。」談到演唱會準備功夫,4子似乎話中有話:「我哋呢個moment仲enjoy緊拍劇,我哋好鍾意拍劇,要拍足24小時先得!拍劇嘅效益最大,做綜藝同唱歌係冇用嘅。(咪唔夠時間排練囉。)客觀嚟講一定唔夠,不過時間好似乳溝咁,點擠都擠到啲出嚟。」肥仔補充:「或者我哋企喺度唱,走位都唔夠時間排,叫舞蹈員自己跳,即係睇佢哋多過睇我哋!」
問到有否邀請鄭伊健擔任嘉賓,4子原來已發出邀請函:「佢要睇吓個期先,希望可以邀請到佢同我哋合唱《數碼暴龍》,或者《友情歲月》。」對於伊健有留意他們的節目,Dee坦言:「超開心,約3年前我同Lokman做金像獎司儀,心情相當緊張,佢親口話認得我,當時我啱啱出道咋,估唔到佢當眾讚我哋,大家知ERROR個名有幾臭,希望冇影響到佢啦!」對於早前於節目內重提揶揄曾志偉事件,期間聲淚俱下,193表示:「只係得3集,唔夠時間喊。(有人話你想搵搲合作?)絕對唔係,都唔同台,講嗰啲都係標題黨傻仔,睇咗我個節目就知道唔係咁嘅意思啦,冇知識先有咁嘅批評,鍵盤戰士收皮啦。」