超能家族！昆凌漂浮半空開餐　周杰倫縮小變「迷你周」

台灣天王周杰倫（周董）近日繼續享受假期。繼早前孖住老婆昆凌與「世界球后」曾雅妮打高爾夫球後，今次就帶埋仔女一家四口出遊去到藝術中心，昆凌於社交網大晒靚相，原來館內有唔少錯位藝術裝置，透過角度錯覺營造出突破人體極限嘅「不可能」照片，其中見昆凌於餐枱前成個飛起，停留喺半空中用餐，十足被風吹起一樣，另一張相則係佢哋一家四口入鏡，不過周董同昆凌突然「縮小」，變得勁迷你，仲細粒過仔女，但實際上係周董同昆凌企喺遠處，透過角度同距離嘅借位造成錯覺效果，相當搞笑，連「縮小」都識，不愧為天王家族！