魏浚笙開始揀歌籌備出碟：想出跳唱歌

藝人魏浚笙（Jeffrey）即將再為ViuTV主持節目《膠戰3》，他笑言等開拍等到望穿秋水：「所以好開心同期待，希望可以去世界各地拍攝。（想去邊？）邊度都唔拘，玩遊戲場地要大啲，但（出埠）公司話要遲啲先得，可能離境政策再放寬少少先。」

至於再拍劇，Jeffery坦言：「如果再有梗係好，依家傾緊啲電影，但未落實。（出唱片呢？）開始揀歌，有幾首都唔錯，籌備中，出道做歌手希望係明年嘅事，有眉目嘞。（想先出快歌定慢歌？）慢歌，因為我有少少手腳唔協調，但都想出跳唱歌畀醒吓神，練吓我都有信心應付嘅。」