袁偉豪壓力大甩頭髮 蔡思貝唔介意被嗌「發電機」

2022年11月26日 18:01
東網電視
更多新聞短片
藝人袁偉豪與蔡思貝今午(26日)出席主演無綫劇《法證先鋒V》宣傳時姍姍來遲,他們解釋因為留守公司拍網上宣傳素材,時間安排有偏差所致,並連聲抱歉。
談到日前開Live自爆非常緊張髮線,袁偉豪說:「真嘅,近呢兩、三年我不斷有周期性脫髮問題,可能因為天氣同唔夠瞓,呢個階段真係擔心嘅,因為唔知嚴重性去邊,有睇皮膚科觀察情況,反而如果有肚腩好小事,但始終我係靠個樣搵食。(唔拍古裝黐頭套?)以前有拍過,但依家年紀唔同,生理狀態不及年輕時。(同壓力有關?)梗係有啦,無形壓力非常之多,每日洗頭都好多頭髮跌落嚟,一定過百條,維持咗成個月。上一年我有段時間將頭髮鏟到好短,有一刻好心灰,唔知發生咩事。」
再問到是否壓力影響情緒,他說:「情緒同生活壓力都會有,始終過去兩、三年市道比較差啲,工作不及以前,負面評論又多,同埋拍《鐵探》時激烈減磅,身體調節可能失調,我都想內分泌控制得好啲,所以少咗飲酒、多啲休息,心情好壞就好睇日常。(你之前話傳媒『錯重』。」
他解釋說:「嗰次做新歌宣傳,內文我亦有親口講過,希望大家明我用咗咁多時間心機,去創造屬於自己嘅歌曲,但原來Focus唔喺作品上,令我突然間有啲反應。我唔需要為自己嘅反應掩飾,亦唔係我控制範圍內,但最終發酵地宣傳唔係我心諗原意嗰樣嘢,呢啲反應亦唔係一朝一夕形成,係長期累積。(覺唔覺得自己情緒化?)情緒化我諗每一個人都會有,只係用咩方法搵出口,的而且確有啲難度,係一個重要嘅課題。我唔能夠話完全唔關自己事,但一隻手掌拍唔響,趁大家有機會見面,都想同保持良好嘅關係同溝通。」
對於記者指他可能「一竹竿打一船人」,他續說:「咁要睇大家嘅睇法,你哋叫我唔好對號入座嘅同事,係唔係你哋都唔應該對號入座呢?大家互相一面鏡,一個小小嘅誤會,可能愈發愈大,我着重大家一溝通多啲。(《愛‧回家》擺你上台。)咪好囉,處境劇搵到題材,都歡迎嘅,好小事,都過咗去嘞,無傷大雅。」
而蔡思貝於《法》劇宣傳開Live,同樣被重提「發電機」花名,她直言全不介意。當被問到經歷過負面新聞,有否竅門教袁偉豪應對,她說:「佢係前輩,唔使我教啦,同埋佢有做開運動,有用嘅。」