郭可盈生日飯食唔完　獲林文龍贈鮮花豪隊3支酒

藝人郭可盈尋日（27日）53歲生日，早前佢率先同老公林文龍撐枱腳食燭光晚餐，又同囡囡林天若攬攬合照，正日同樣同屋企人過，不過今次佢就有晒Decore，除咗孖林文龍、囡囡及好友到靚景餐廳食飯，佢兩母女仲約埋一齊着上紫色親子裝，喺夜景襯托下，壽星女又品嚐滿台靚酒，足足有3支咁多，加埋佢晒出老公所送嘅鮮花擺設，上面又有小卡片寫住「老婆生日快樂」，襯埋兩夫婦頭貼頭合照，真係恩愛到爆！