「李莫仇」婚宴集齊3大視后　JW搶花球輸畀男人

TVB處境劇《愛回家之開心速遞》中「李莫仇」張詩欣尋日（28日）拍拖多年嘅攝影師男友陳家勝大婚，本身佢哋嘅兄弟姊妹團已經有多位藝人擔任，估唔到去到下午婚宴部分更加星光熠熠，當中就有3大視后李佳芯、蔡思貝、林夏薇及多位男神女神如陳瀅、劉佩玥、JW、朱敏瀚、張達明、周嘉洛、鄭丹瑞、洪永城、翟威廉及張振朗等，人氣及卡士直頭媲美台慶級數！

當中最令人興奮嘅搶花球環節，就引得陳瀅、李佳芯、蔡思貝及劉佩玥等眾人出嚟搶花球，點知最後由翟威廉搶到，蔡思貝同阿Moon恭喜翟威廉，叫佢快啲結婚，反而拍拖多年、同男友感情穩定嘅JW就飲恨，仲對住鏡頭大叫唔甘心，一副恨嫁樣出晒嚟。