薛家燕送玩具車畀孫仔慶生：佢識同自己講Happy Birthday！

藝人薛家燕日前出席廚具活動，現場吸引半百觀眾圍觀。家燕對食好有要求，但鮮有親自落廚，因為覺得要煮得色香味俱全需要多功夫，而她少入廚房，全因家中已有位「廚神」：「我新抱好鍾意煮嘢食，之前抗疫期間，我哋好少出街食，一日三餐都係佢煮咁滯，佢真係煮得好叻，近日佢仲教埋我孫仔煮，早前我孫仔生日，佢兩個就一齊整蛋糕，孫仔整完仲同自己講Happy Birthday！真係好得意，好可愛。」

家燕姐孫仔Julian18個月生日，身為嫲嫲的家燕為他慶祝，送上大批玩具車：「因為Julian對好多交通工具都好有興趣，喺度學緊好多類型車嘅生字，所以做嫲嫲就投其所好，孫仔很開心。」

剛在馬來西亞工作返港的家燕，留港數天後，又要起程飛美國：「今年聖誕節應該都要響美國過，因為之前疫情冇得飛，依家可以飛，就有好多歌債要還。好耐冇飛去登台見吓老朋友，所以都好開心呀，應該都要忙到農曆年前，過年就應該會返香港。因為今年會有套賀歲劇《黃金萬両》出街。」